രാഷ്ട്രീയ ഗുണ്ടാസംഘങ്ങളെ നിലക്കുനിര്‍ത്തണം -ജമാഅത്തെ ഇസ്ലാമി

രാഷ്ട്രീയ ഗുണ്ടാസംഘങ്ങളെ നിലക്കുനിര്‍ത്തണം
-ജമാഅത്തെ ഇസ്ലാമി

കണ്ണൂര്‍: തളിപ്പറമ്പിലും പരിസരപ്രദേശങ്ങളിലും കൊലപാതക രാഷ്ട്രീയത്തിനറുതി വരുത്താന്‍ കര്‍ശന നടപടി സ്വീകരിച്ച് സമാധാന ജീവിതം ഉറപ്പുവരുത്തണമെന്ന് ജമാഅത്തെ ഇസ്ലാമി നേതാക്കള്‍ ആവശ്യപ്പെട്ടു. അക്രമങ്ങള്‍ക്ക് പിന്നില്‍ രാഷ്ട്രീയ സംഘടനകള്‍ തീറ്റിപ്പോറ്റുന്ന ഗുണ്ടാസംഘങ്ങളാണെന്നത് പകല്‍പോലെ സത്യമാണ്. ഇതിനെ അമര്‍ച്ച ചെയ്യാന്‍ കഴിയാത്തത് ഭരണകൂടത്തിന്‍െറ ദൗര്‍ബല്യമാണ്. ഒരു ഭാഗത്ത് സമാധാന യോഗവും മറുഭാഗത്ത് ഗുണ്ടാസംഘങ്ങളുടെ വിളയാട്ടവും തുടരുന്നത്് അക്രമ രാഷ്ട്രീയത്തിന്‍െറ വക്താക്കള്‍ സമാധാനത്തിന് ആഗ്രഹിക്കുന്നില്ളെന്നതിന്‍െറ തെളിവാണ്.
നിസ്സാര സംഭവങ്ങളെ പെരുപ്പിച്ച് വൈകാരികമായി ജനങ്ങളെ കൊമ്പുകോര്‍പ്പിച്ച് നേതാക്കള്‍ നടത്തുന്ന സാമൂഹികദ്രോഹം പൊതുജനം തിരിച്ചറിയണം. സംഘര്‍ഷ പ്രദേശം സന്ദര്‍ശിച്ച ജമാഅത്തെ ഇസ്ലാമി നേതാക്കള്‍ പ്രസ്താവനയില്‍ ആവശ്യപ്പെട്ടു. കാസര്‍കോട് ജില്ലാ പ്രസിഡന്‍റ് യു.പി. സിദ്ദീഖ് മാസ്റ്റര്‍, കണ്ണൂര്‍ ജില്ലാ സെക്രട്ടറി കളത്തില്‍ ബഷീര്‍, പി.ആര്‍. സെക്രട്ടറി കെ.പി. ആദംകുട്ടി എന്നിവരുടെ നേതൃത്വത്തിലുള്ള സംഘമാണ് കൊല്ലപ്പെട്ട ശുക്കൂര്‍, ആക്രമിക്കപ്പെട്ട മോഹനന്‍ എന്നിവരുടെ വീടുകള്‍ സന്ദര്‍ശിച്ചത്.