ശിവഗിരിയുടെ മഹത്വത്തിനേറ്റ കളങ്കം -വെല്‍ഫെയര്‍ പാര്‍ട്ടി
തിരുവനന്തപുരം: സാമൂഹിക നവോത്ഥാനത്തിന്‍െറ ഈറ്റില്ലമായ ശിവഗിരിയിലേക്ക് നരേന്ദ്രമോഡിയെന്ന നരാധമനെ എഴുന്നള്ളിച്ചതിലൂടെ ആശ്രമത്തിന്‍െറ മഹത്വത്തെ കളങ്കപ്പെടുത്തിയെന്ന് വെല്‍ഫെയര്‍ പാര്‍ട്ടി സംസ്ഥാന ജനറല്‍ സെക്രട്ടറി കെ. അംബുജാക്ഷന്‍ കുറ്റപ്പെടുത്തി. മോഡിയെ ബഹുമാനിക്കുക വഴി ശ്രീനാരായണ ഗുരുവിനെ അപകീര്‍ത്തിപ്പെടുത്തുകയാണ് ശിവഗിരി ഭരണസമിതി ചെയ്തത്. ശ്രീനാരായണീയ പ്രസ്ഥാനങ്ങള്‍ ഇത് നേരത്തെ മനസ്സിലാക്കി ഈ അപകടത്തില്‍ നിന്ന് ശിവഗിരിയെ രക്ഷിക്കേണ്ടിയിരുന്നു. ശിവഗിരിയെയും എസ്.എന്‍.ഡി.പിയെയും രാഷ്ട്രീയ താല്‍പര്യങ്ങള്‍ക്ക് വേണ്ടി ഉപയോഗപ്പെടുത്താനുള്ള വര്‍ഗീയ ശക്തികളുടെ ഗൂഢനീക്കങ്ങളാണ് മോഡിയെ ആനയിച്ചതിന് പിന്നിലുള്ളതെന്നും പ്രസ്താവനയില്‍ പറഞ്ഞു.
