നിയമം നീതിയുടെ വഴിയിലൂടെ നീങ്ങണം -ഡോ. സെബാസ്റ്റ്യന്‍ പോള്‍
പഴയങ്ങാടി: നിയമം നിയമത്തിന്‍െറ വഴിക്കല്ല, നീതിയുടെ വഴിക്കാണ് നീങ്ങേണ്ടതെന്ന് ഡോ. സെബാസ്റ്റ്യന്‍ പോള്‍. പഴയങ്ങാടി ഫ്രൈഡേ ക്ളബിന്‍െറ ആഭിമുഖ്യത്തില്‍ ‘നീതി നിഷേധം ഇന്ത്യയില്‍’ എന്ന വിഷയത്തെക്കുറിച്ച് പ്രഭാഷണം നടത്തുകയായിരുന്നു അദ്ദേഹം. ഭരണഘടനയുടെ അനുച്ഛേദം 14ല്‍ പൗരന്‍െറ അവകാശത്തെക്കുറിച്ച് പറയുന്നുണ്ടെങ്കിലും ഇവ പാലിക്കപ്പെടുന്നില്ല. കേരളത്തിലെ മത്സ്യത്തൊഴിലാളികളെ വെടിവെച്ചു കൊന്ന ഇറ്റലിക്കാര്‍ക്ക് സ്വന്തം നാട്ടില്‍പോയി വോട്ട് ചെയ്യാന്‍ നാല് ആഴ്ച സമയം അനുവദിച്ച കോടതി അതേ നിയമത്തിന്‍െറ ആനുകൂല്യം ഇന്ത്യന്‍ പൗരനായ മഅ്ദനിക്ക് അനുവദിക്കുകയില്ല എന്നത് നീതി നിഷേധമാണ്. നീതി നടപ്പാക്കാനുള്ള ഉപകരണമാണ് നിയമം എന്ന തിരിച്ചറിവാണ് വേണ്ടത്. 11 വര്‍ഷമായി ജീവിക്കാനുള്ള അവകാശത്തിന് നിരാഹാരം നടത്തുന്ന ഇറോം ഷര്‍മിളക്കെതിരെ ആത്മഹത്യക്ക് കേസെടുത്ത നാടാണ് ഇന്ത്യ. സ്വാതന്ത്ര്യം നേടുന്ന സമയത്ത് എ.കെ.ജിയെ ജയിലിലടച്ച ഭരണകൂട ഭീകരതയുടെ നീതി നിഷേധം ആറ് പതിറ്റാണ്ടിന് ശേഷം മഅ്ദനിയെ ജയിലിലടച്ച് തുടരുകയാണ്.
മഹാ സാമ്രാജ്യങ്ങളെ തകര്‍ത്തെറിഞ്ഞ ജീര്‍ണത ഇന്ത്യയെയും ബാധിച്ച വര്‍ത്തമാനകാല സാഹചര്യത്തില്‍ ലോകത്തിലെ ഏറ്റവും വലിയ ജനാധിപത്യ രാജ്യത്തെ സംരക്ഷിക്കാന്‍ ജനങ്ങളും മാധ്യമങ്ങളും മുന്നോട്ടു വരണം -അദ്ദേഹം പറഞ്ഞു. ഡോ. എസ്.എല്‍.പി. ഉമര്‍ ഫാറൂഖ് അധ്യക്ഷത വഹിച്ചു. മാടായി ഗ്രാമപഞ്ചായത്തംഗം പി.എം. ഹനീഫ് സംബന്ധിച്ചു. മഹ്മൂദ് വാടിക്കല്‍ സ്വാഗതവും ഡോ. മുഹമ്മദ് അസ്ലം നന്ദിയും പറഞ്ഞു.
No comments:
Post a Comment
Thanks